07 Jul 2017
弱聽 截肢 腫瘤 刀片人跑出馬賽克人生
右腳沒了、脾臟沒了、聽力衰退了，不幸……還要沒完沒了？！
伴隨她的，還有佈滿全身的血管腫瘤……
醫生曾斷言，她未必活過20歲，惟，她以正能量跨過重重難關：「每一日都係賺番嚟。」
上天一直跟她開玩笑，她卻淡然悟出生命猶如馬賽克（Mosaic），縱使人生有種種不完美的苦難，但苦難與苦難之間總有接合點，拼湊起來，就成一幅美麗的圖畫。
她是香港首名「刀片跑手」── 翟文鳳。
現年四十的文鳳(Janice)自出娘胎就患有嚴重血管腫瘤，更擴散至脾、肝、腰骨、顱底骨，「身體每一個地方都隨時有腫瘤，但我（事前）唔知，到痛就知擴散到嗰到。」 「右腳大脾以下全部係腫瘤，我截肢個位切咗成個橙咁大嘅腫瘤出嚟。」2005年，文鳳切除右腳；五年後，血管瘤擴散至脾臟，「脾臟漲大咗三倍，食唔到嘢，不斷嘔……」最終整個脾臟也不保。
常定睛跟人交談的文鳳，其實因中度弱聽而需非常專注，「正常人係20分貝以下就聽到聲，但我係50至60、甚至70分貝先聽到，形成我講嘢唔正，某啲字我發唔到音。」
治療如行刑 返學被排擠
「好多人最開心係童年，但我最唔開心就係童年。我成日喊，係一個大喊十。」文鳳5歲喪母，加上父親患嚴重眼疾近乎失明，自小由兄姊照顧，且常入院治療，「物理治療師拉直我隻腳，好似行刑咁痛」。
文鳳坦言，留院時間比在家及學校更長，而每次回到校園，心情只會更沉重，「我唔多時間返學，佢哋唔太識我，唔知點同傷殘人士相處，會笑我、蝦我，我感覺被冷落、冇人理。」加上跟不上教學進度，令文鳳更不想上學，慢慢變得自卑，「開始收埋自己，好懦弱，成日唔講嘢，只會點頭同擰頭。」
返工手腳慢 但揾番自己
童年在歲月中褪色，19歲的文鳳在「社會大學」漸漸尋回信心，「我唔可以再收埋自己，我不斷學習，慢慢喺工作中揾番自己。」「攞文件、用具，健全人做8個鐘，我可能要做12個鐘。」慶幸身邊有一班諒解她的同事，「同事好關心，成日問有咩幫手、唔舒服要出聲，幾窩心！」2005年，文鳳迎來人生的大衝擊──切除右腳，「啱啱着義肢，企都企唔到，坐喺地下喊咗好耐。諗番義肢矯型師話係我戴義肢行，唔係義肢帶我行」。經過一年努力，終成功用義肢行路，沒料到，這只是起點。
初試跑步 感受速度快感
「義肢矯型師問我有冇諗過跑？我話冇諗過，我行都行得唔係好好，點跑呀？想像唔到我可以跑。」在義肢矯型師幫助下，文鳳成為本港首名「刀片人」，「喺跑步機上用刀片腳試跑，原來比正常人行快少少嘅感覺，好滿足！」終於能「腳踏實地」，文鳳更嘗試挑戰不同運動，游水、攀石、行水、踩單車等，「我大腿截肢，需要比正常人付出多七倍氣力去完成，如果我突破到自己，係好大嘅激勵同提醒！」
挑戰馬拉松 得天使幫忙
挑戰自己，不但需要勇氣及決心，也得靠「天使」幫忙，「行山有行山教練，踩單車有單車教練，跑步有陪跑員。我能夠做到每樣運動，都要經過改裝，用心思去配合，先可以完成到。」文鳳以渣馬10公里賽為例，一般跑手兩小時內已能完成，「但我用盡氣力、盡量唔停，都超過兩個鐘。譬如第一年去到5公里，隻腳開始無力，陪跑員畀食物我補充體力；去到7公里，我條腰嘅腫瘤痛，距離終點仲有3公里好遙遠」。幸陪跑員不斷矯正其跑姿，加上臨近終點前的氣氛，令她成功衝線。
唔係唔想行 係我行唔到
病患並未磨蝕文鳳的鬥志，反而旁人的無情話，卻刺痛心扉。有一年一家人上山拜祭媽媽，文鳳因行動不便需哥哥背着上山，途人竟冷冷的說：「你咁大個人，好心自己落地行。」文鳳伏在哥哥背部嚎哭，哭得哥哥的背脊濕透，「唔係我唔想行，係我行唔到，心酸嘅感覺好大，但途人唔明白。」
截肢後，文鳳為方便穿戴或脫下義肢而穿上短褲，豈料鄰居說：「你着長褲好好睇，唔好着短褲喇，會嚇親小朋友。」亦曾有人因回頭望着文鳳的義肢，差點「撞柱」。
義肢不普及 藉比賽推廣
面對冷嘲熱諷或奇異目光，幸文鳳自有一套解讀，「我由細到大都係傷殘人士，我容易消化到，後天傷殘嗰種難堪感覺更大」。她更明白，為何截肢者寧願長期穿上長褲遮掩，也不願面對世俗眼光。文鳳認為，義肢的不普及，令社會產生更多不理解，「義肢都係一種輔助工具，好似輪椅、手叉或助行架，點解義肢有人望呢？」所以她透過參加馬拉松、三項鐵人等賽事，希望讓大眾認識義肢以及截肢者的能力。
熱愛陶瓷 手藝傳殘障童
「我好鍾意陶瓷，由一嚿泥變做一件器皿，睇番我哋嘅生命係咪都係咁，真係好奇妙。」出自文鳳一雙巧手的作品曾揚威日本，令她甚有成功感；她更曾親手做一隻陶瓷義肢送給義肢矯型師為禮物，「陶瓷訓練我嘅耐性、專注，你好專注去做嗰樣嘢，先會做得靚」。她更將陶瓷比喻為人生，「你唔係一出世就一定好幸福嘅環境或者身體，當我經歷過病患、多次手術，復康過程睇到屋企人嘅關心、朋友對我嘅愛，我嘅正能量會大咗。」
文鳳不但將自己的陶瓷手藝教授傷殘小朋友，更不斷做義工，終於2014年奪得「傑出義職獎」，「呢個獎好多人參與，着重你用心去做義務工作。我用我嘅經歷感受去探訪、分享點去面對困難，幫到同路人喺低處時有盼望，攞到呢個獎我好開心、好榮幸」。
刀片腳回彈力大
文鳳右腳上的膝關節能配合運動功能，跑步時只要脫下日常用的義肢，換上C字型「刀片腳」即可。刀片腳配有鞋底，着地點小，回彈力大。「我喺醫院長大，經歷過唔同治療、感受過當中嘅痛苦。希望每一位而家接受緊治療同克服緊困難嘅朋友，唔好放棄自己，積極面對困難，我哋嘅困難總會跨過，希望大家有精彩而美麗嘅人生。」
守護天使：陪跑係我嘅榮幸
Eddie是文鳳跑步時的護航員，自言若不是文鳳，也「的唔起心肝」跑渣馬，「咁辛苦、人又多，又咁早…….但有機會畀我陪佢跑，我覺得係好好嘅支持！」曾兩次陪文鳳完成渣馬的Eddie，猶如文鳳跑道上的「守護天使」，「比賽有好多人，其他跑手睇唔到佢，或者想爬佢頭，我就會前後留意，唔畀啲跑手咁接近。」
「我要多謝文鳳畀機會我同佢一齊完成賽事，呢個係我嘅榮幸！」
