22 Jun 2018
三條腿 一條心 刀片飛人 攜妻勇挑極地大滿貫
三條腿、一條心。這是眼前這對夫婦給小記的最強感受。這幾天，平均溫度約35度，全港多區體感平均逾40度，破了42年來5月的最熱紀錄。烈日當空，人人巴不得躲於雪櫃過活，65歲越野跑手馮錦雄和太太莊冰英卻選擇戶外負重及跑山訓練；「自虐」背後，實是為適應到極地比賽時變幻莫測的氣候，酷熱天氣下操練，既是增強體能，亦在鍛鍊意志。
「係咪就咁坐喺屋企？」
強人的煉成，大多由低潮開始。馮sir本是好動的體育教師，可惜30多年前突遇車禍，從此失去左小腿……雖可作簡單運動，但不能劇烈。「我係一個傷殘人士，係咪就咁坐喺屋企？作為一個折下肢嘅傷殘人士，比較難做用腳嘅運動，如衝破呢個最困難點，我估計日後生活嘅困難都唔難應付。
今天，一切說得淡然；過去，義肢曾是馮sir的心理枷鎖，「都有啲無謂，諗人地點睇自己，擔心人地歧視自己。」持續了好幾年的心理包袱，隨運動而漸漸放下。約10 年前，從不運動的馮太為了健康開始行山；為了陪伴太太，馮sir運動熱情再被重燃；2008年，二人更參加了100公里路程的「毅行者」比賽，踏出越野跑手的第一步。
「我唔著靴 著義肢唧！」
義肢不再成負擔，但物料沉重及欠彈性，若進行劇烈運動，大腿骨骼會承受較大衝擊力，易磨損肌肉。2009年，馮sir在義肢矯形師的協助下，換上碳纖物料運動型義肢，成為香港首位使用「刀片腳」的傷健人士；自此，倆口子的跑道更廣更遠，在不同的公開比賽中突破自己。
因要參與不同運動，常穿短褲的馮sir不時露出義肢，逐漸習慣別人的目光，亦不知不覺把包袱放下。「當人哋唔再覺得你特別，自己都唔會再覺得自己好特別。」隨心而行，馮sir的心結也漸漸解開。「好可能係自己問題，將自己睇成一個特別嘅人……我只不過係改變左少少，你著靴，我唔著靴，我著義肢唧！」
因要參與不同運動，常穿短褲的馮sir不時露出義肢，逐漸習慣別人的目光，亦不知不覺把包袱放下。「當人哋唔再覺得你特別，自己都唔會再覺得自己好特別。」隨心而行，馮sir的心結也漸漸解開。「好可能係自己問題，將自己睇成一個特別嘅人……我只不過係改變左少少，你著靴，我唔著靴，我著義肢唧！」
靠着我的人肉行山杖
一場車禍，讓截肢體育老師跟初出茅廬的骨科護士連上。結婚三十多年來，夫婦倆共同走過人生的高低起跌。十年來，二人總是形影不離參加不同運動比賽，「人哋問我點解冇行山杖？咪喺我側邊囉，人肉行山杖吖嘛！開初訓練時，水都放喺佢身上，變咗我嘅駱駝！」在旁聽着的「行山杖」笑得合不攏嘴。
兼任最佳戰友及鼓勵員，馮太更是細心體貼的專屬私家看護，「我始終比一般人唔同，太太最了解…佢會好小心，所有嘢都有晒預備，膠布又預多兩塊，令我冇後顧之憂。」教馮sir盛讚的，還有太太的推動力。「連唔做運動嘅人都參加馬拉松，咁我都可以做到！我只係比佢困難多一啲，其實都唔係唔可以。」
「呢個角色應該冇人替代到，係嘛？！」自信的眼信、肯定的語句，對於太太的反問，二人不禁相視而笑。這畫面，相信就是答案。
「有乜嘢 留返上山講！」
「對手機多過對人」的城市生活紛擾太多，他倆則回歸基本，專注理解對方所需，感情與信任建於運動中的結伴與溝通。「有時喺屋企鬧交，鄰居會聽到，如果我哋上山，鬧交唔會有人聽到…有咩都喺山上解決！行山時可更專注於兩人嘅溝通、更集中交流，運動中嘅我哋更加合拍。」
沒有華麗的詞彙，只有平淡的閒話家常，卻滲出實實在在的溫馨感，馮太笑言「佢唔浪漫㗎！」但，丈夫無比的毅力及堅持，最教她欣賞，無論多大的挑戰也願意克服，這點給予自己很大的鼓舞和勇氣，才有信心一直走下去！「馮sir肯行出嚟，已經係對我最大嘅支撐！」
沒有華麗的詞彙，只有平淡的閒話家常，卻滲出實實在在的溫馨感，馮太笑言「佢唔浪漫㗎！」但，丈夫無比的毅力及堅持，最教她欣賞，無論多大的挑戰也願意克服，這點給予自己很大的鼓舞和勇氣，才有信心一直走下去！「馮sir肯行出嚟，已經係對我最大嘅支撐！」
運動不但促進夫妻之間的默契，更使馮sir勇敢克服截肢的後遺症。至今，「幻肢痛」的神經痛楚偶也發生，令他難以入睡。但馮sir堅拒藥物，把專注力分散在步履之間。「我願意行出來象徵一個健康的影響或正能量！」
看似不可能 原來係可能
「第一次就已經好難忘！」自3年前開始，他倆開始挑戰不同的極地馬拉松比賽，成功橫越智利的阿塔卡馬沙漠（Atacama），並獲團隊賽冠軍，「一支拉雜成軍、年紀最大嘅團隧，竟可戰勝健全朋友。有時看似不可能，原來係可能發生嘅！視乎自己肯唔肯踏出第一步！」去年，馮sir更成為首個完成戈壁沙漠馬拉松的「刀片飛人」，在6天內征服250公里賽事，成績斐然。
馳聘於無數賽道，老貓也有燒鬚一刻。極地日夜溫差可達攝氏50度，加上全程背上所有裝備及食糧，是極級艱鉅。而且馮sir左腳接觸任何地面與物件皆無感覺，容易跌入沙丘的浮沙之中，「我試過成隻義肢陷入沙裏面，當我掹出嚟時義肢即脫離，差啲受傷。」
「一直玩，玩到唔得為止」
惟，艱辛沒磨蝕他的熱情，反令他更享受比賽，不斷挑戰極限；更決心完成其餘兩項四大極地－撒哈拉沙漠及南極的馬拉松，「完成大滿貫極地比賽，係我們嘅願望！」「我們年紀都大，可以玩，就一直繼續玩，玩到自己唔得為止！點解咁大年紀都要繼續比賽，就係因為有目標，你有明確目標，想登珠峰或跑沙漠，就真係要去訓練。」
訪問正值炎夏正午，馮sir家中沒開空調，夫婦二人卻從容不迫，享受清風。為讓身體適應沙漠的高溫，在香港的訓練可謂「烈陽神功」。「天氣好與壞都訓練，頂着太陽。如果太陽猛烈底下都能夠繼續，就會事半功倍！」
「遇到困難時一定會好辛苦，但其實只要叫一聲『啊！』出嚟，就激勵到自己。人生可能每一日，每一分鐘都遇到困難，每一步可能都好難行，但只要肯行出去，就會有好嘅前路，正所謂關關難過關關過，我哋用呢個作為格言俾自己鼓勵。」
「我哋......其實仲可以付出。」
今年9月，這對孖寶再會接受新挑戰，他們將連同Lifewire及「極地同行」，帶罕見病童跑戈壁沙漠。「呢次會有更充足準備，將自己義肢同殘肢嘅連接做好啲。」馮SIR笑言已積極備戰，特別在負重訓練上，另外，他也積極學習溝通技巧，希望到時能照顧到小朋友的情緒需要。
「作為傷殘人士能夠幫到其他同路人，我都覺得好有意思。健全朋友支持我哋當然好歡迎，但同路中人能夠互相扶持，傷健共融。其實傷健朋友都能夠做到好多嘢。我哋唔單止接受支援，我哋其實仲可以付出。自己能夠付出幾多就付出幾多，呢個先至係價值。」
經歷表
1979 遭遇交通意外，馮SIR失去左小腿，換上義肢。
2008 馮SIR與馮太一起參加100公里路程的「毅行者」比賽。
2009 換上運動型義肢，開始更積極參加各類型的戶外活動。
2015 參加四大極地之一智利阿塔卡馬沙漠（Atacama）250公里團隊賽事，勇奪冠軍。
2017 參加四大極地之一戈壁沙漠250公里團隊賽事，成為首個完成該比賽的「刀片飛人」。
採訪、撰文：梁劍紅、梁嘉信、張文意
編審：梁劍紅
攝影：林栢鈞
影片製作：Lifewire、陳澤朗、Sea.Pho.Yea
經歷表
1979 遭遇交通意外，馮SIR失去左小腿，換上義肢。
2008 馮SIR與馮太一起參加100公里路程的「毅行者」比賽。
2009 換上運動型義肢，開始更積極參加各類型的戶外活動。
2015 參加四大極地之一智利阿塔卡馬沙漠（Atacama）250公里團隊賽事，勇奪冠軍。
2017 參加四大極地之一戈壁沙漠250公里團隊賽事，成為首個完成該比賽的「刀片飛人」。
採訪、撰文：梁劍紅、梁嘉信、張文意
編審：梁劍紅
攝影：林栢鈞
影片製作：Lifewire、陳澤朗、Sea.Pho.Yea
