19 Aug 2016
江美儀 明天會更好
曾經，負能量「爆燈」，百病叢生。
如今，正能量「滿瀉」，滿心感恩。
她，是藝人江美儀。
入行逾20年，鏡頭前總是大情大性、嘻嘻哈哈，誰知銀幕後，卻跟驚恐症、子宮頸病變、情緒病……掛鈎。
還幸，、適當運動助她重踏正軌，更漸漸參透「健康無價」、「唔想賺錢冇命享」的寶貴道理。
心存感恩、更不忘寄語一眾病痛中的兒童、照顧病童的父母：「明天會更好！」
笑迎治療 走出病困
在亞視的那些年，美儀事業愛情兩失意，負面情緒飆升令她身體無法負荷……病，由此而生。她先患上驚恐症，對聲音特別敏感，連友儕飯局也只限於食店房內進行，生怕受外界聲音困擾。約半年後，子宮頸病變，差點患上子宮頸癌，飽受手術之苦，情緒跌至谷底，連服藥的意志也大受影響。
「自己成日唔開心又黑口黑面，照鏡時覺得自己好老、好殘、個人好攰，好彩嗰時啱啱有新拖拍，你會想自己好啲，可能呢個動力就令到我不如試下去食藥啦！」
幸好，美儀不抗拒接受情緒及藥物治療，加上積極思維（positive thinking）助她阻隔負能量，最終不受情緒病左右而否定自己，「經歷咗10年喇，耳濡目染所有嘢都正能量嘅時候，個病情都會減輕啦！」
「唔想賺錢冇命享」
驚恐症、子宮頸病變、手術……前年更因咳嗽導致肺膜扭傷，卧床八日足不出戶。經歷久病纏身，一句「唔想賺錢冇命享」道盡美儀對健康的看法。
有病食西藥、調理靠中藥，美儀認為做運動才是良方，「做運動真係好幫到手，令到血壓開始有正常嘅數字畀人見下，因為我之前血壓低，最低有80幾、50幾，幾乎入醫院咁濟。我以前成日都周身骨痛，成日要去『揼骨』，但『揼』完之後都係咁痛，但我現時做運動根本唔使去『揼』，冇晒周身骨痛，咁你就知啲瘀痠喺你運動時帶咗出嚟，咁你個人冇咁容易攰，所以我現時keep住做gym」。
演輪椅病人 啟發更深
作為演員，美儀飾演過無數角色，而飾演輪椅上的病人最令她有所體會，「有時我會幻想去洗手間，死啦咁污糟，佢哋又冇得矻起……咁佢哋去廁所咪好論盡？我都會咁諗，覺得有時身體健康真係好緊要！」
睹孩童笑容 更懂感恩
美儀熱心參與慈善活動，不但身體力行，更呼籲身邊好友一同參與。當她透過不同活動，看到孩童臉上流露出天真可愛的笑容，「感恩之心」油然而生，亦明白到「凡事並非理所當然」的道理。
「請啲細蚊仔去食嘢，佢哋個笑容我諗番起都覺得好可愛，原來你一直以為理所當然嘅嘢，喺某啲朋友身上係好難得到嘅，譬如有啲細蚊仔未食過生日蛋糕、未食過自助餐，尤其係呢啲嘢你日日都有機會去做，或者你根本厭咗，食到唔想再食，唔想再去……」
美儀語錄
「我知道條路係難行嘅，但係難行我哋都要過。」
「我覺得要畀啲信心自己，當你覺得你一定會好，你第日就會好番㗎喇！」
「我相信只要你捱過呢一關的話，好嘅嘢就會嚟！」
「我相信明天係會更好的！」
狗奴才vs小霸王
美儀性格瀟灑，崇尚自由，但也自嘲為「怪獸家長」！未婚的美儀，視愛犬Teddy如親生子，「兩母子」有影皆雙，不論工作還是出席慈善活動，她身旁總會見到Teddy的身影，而Teddy的視線總也離不開「媽媽」，「兩母子」比情侶還癡纏。
「有乜事寧願自己受，唔好令佢唔舒服！」美儀笑說，家中廳房幾乎都是Teddy的「狗竇」，食物、玩具、防滑地毯、天然洗牙用品等…散佈每個角落，連工人也是Teddy專用，令牠成為「家中小霸王」，難怪，美儀都常被朋友取笑是「狗奴才」了。
