一切由2011年說起。當年5月1日實施最低工資，明哥的燒臘店生意陷入困境，一度萌生結業念頭……豈料兩個月後，政府派6,000元，但有20名年輕人覺得派錢不公平，決定捐出自己所得的6,000元，向明哥訂飯，再與明哥在每個月最後一個周六往派飯。

派飯片段被放上網後，不但讓人認識他們的活動，更吸引電視台前往拍攝，明哥的生意如吞下「還魂丹」，「節目出街後第二日，好多市民湧嚟了解我哋係咪真係咁平咁抵食，成日要等位，生意穩定咗。之後我承諾只要夠出糧夠交租，我哋就唔加價。由2011年至到今年3月，都係堅持22蚊三餸飯。」

一個月後，有份拍攝該節目的洪金寶到燒臘店探明哥，了解節目對他幫助有多大，「臨走佢擺低1萬蚊，叫我幫佢派飯畀老人家同冇飯食嘅人」。就是這1萬元，推動明哥繼續派飯，由每月一次變成每周六都派，飯盒數量與支持他的有心人皆與日俱增。自此，傳媒廣泛報道明哥的善行，其燒臘店亦被譽為「愛心飯堂。」

 

明哥的派飯對象由最初的露宿者，到後來有獨居長者及南亞裔人士，這個擔子越來越重。明哥每早10時開舖，完成午市及茶市，明哥就會在大南街分店指揮，為派飯作準備，義工則忙於舀飯、入箱等。派飯後的「指定動作」，就是明哥分享會，與義工談談理念、講講理想；義工對明哥的善行滿心好奇，甚至不解為何部份露宿者正值壯年，卻遊手好閒等飯食？「你要解釋畀佢聽，佢哋係越南難民，攞行街紙唔畀做嘢，政府得1200蚊畀佢哋，佢哋租唔到房，食都未夠。」

每晚10時至深夜1時是明哥的私人時間，「埋數」、落閘收舖一腳踢，之後還需預備翌日大小事，「我每日要有7至8個鐘頭瞓覺，呢個係最基礎，咁先有精神做嘢。」

 

年中無休 唔辛苦

觀乎他的慈善「業務」，他所需的精神或許是他人的N次方，每年只休農曆大年初一及初二充電；但踏入2017年，僅如的兩天假也得往嘉年華會擺檔，變相全年無休，「好開心，唔辛苦。係比之前辛苦少少，但覺得多咗運動，會開心啲。」

忙得有家歸不得，乾脆租住一街之隔的板間房。家人沒埋怨嗎？明哥笑笑口，「佢哋融入咗落去，一齊喺度做。我幾十年容乜易過，就算冇錢都要開開心心過活。」





小記眼前浮現出「平民慈善家」五個字，明哥卻未敢以此自詡，眼睛瞇成一線的他，隨即哼出電視劇《包青天》主題曲：「號召同路人 為人類建樂園 共同付努力 丹心一片……」明哥深感有心人其實很多，惟很多時籌款活動的善款卻不易追溯，「但喺我呢到訂100個飯，就係派出100個飯，好簡單。」

明哥認為政府做事多規範多制肘，難以及時幫助有需要的人，他以早前一幢唐樓發生火警為例，現場被封鎖，居民被迫入住避寒中心，有區議會聯絡明哥，要求他為災民提供飯盒，明哥二話不說就答應，「我叫佢半個鐘後嚟我度車飯，但半個鐘你搵個社會福利主任出嚟都搵唔到。」



轉營社企 盼財團贊助

眼看近半社企營運不善，兩年內將基金耗盡結業，「咁就唔係社會企業，係使錢企業，無法真正幫到人……」所以他決定將「北河同行深水埗」轉為社企，希望成為一個樣辦，獲得政府認可後，可將同類理念擴展到其他較貧窮的地區。

至於「進佔」哪些地區，明哥指屆時會由各區義工提供意思，再決定哪個地區最窮、最需要優先協助，「希望幫佢哋及時解決問題。」





要遍地開花，一腔熱誠外，更首要的是----錢！明哥盼大財團襄助，「譬如一間公司每年要納3,000萬（稅）畀政府，喺嗰度攞200萬開一間，用佢哋名義去贊助呢間慈善飯堂，畀咗個起動我哋之後，我哋就用番市民嘅力量繼續派飯，幫有需要嘅人，佢哋可以搵個榮譽董事嚟監察我哋所做嘅係值唔值得。」

 

撐住拐杖都繼續做

展望將來，明哥打算於每間新增的「北河同行」，均聘用聾啞人士、更生人士，協助他們重投社會，「用我哋嘅活動去帶動佢哋，等佢哋對社會有貢獻……培養佢哋喺某一個崗位，有一個固定收入、穩定嘅工作，佢哋會勤力去做，帶動佢哋個愛心出嚟。」

魄力多麼強，總有退下來的一天吧？！「退居二線都要撐支拐杖出嚟撐住佢哋！」堅定的語氣，蓋掩不了明哥培訓接班人的刻下目標、誓要延續善行的決心。

明哥憶述年幼時受過不少恩惠，故長大後立志要努力賺錢幫人，但他笑言這目標到60歲還未達成，「我心太軟，啲貨想平啲賣畀街坊，希望幫街坊，但賺唔到錢……派飯後才知道我個心成日想幫人，原來個心要放喺慈善嘅肥料裏面，先可以開花結果，其他肥料唔啱我用」。





點解叫北河同行？

「我哋個活動要保持中立，團結所有人嘅力量，令唔同議員、唔同膚色、唔同國籍、唔同政見、唔同年齡嘅人都參加我哋嘅活動，所以叫做北河同行。」目前位於大南街的基地名為「北河同行深水埗」，明哥計劃將來在其他地區開店，就會以該區命名。



義工心聲

Hello哥：「明哥願意喺自己個袋度揞錢出嚟派飯，好難得，香港冇10%嘅人會咁做。」

好奇心，令「Hello哥」與明哥遇上，「八卦嚟睇下邊個明哥派飯，後來見唔好多人幫手，我又可以畀多啲時間做，覺得搬搬抬抬我做得嚟，就嚟幫手」。明哥給他的第一個感覺是「事事親力親為」，身體力行所散發的感染力，令不少義工都願意「攞個心去做呢件事（派飯）」。

每月至少有20日幫明哥派飯的Hello哥謙稱，從不覺得自己幫助很多人；年復年、月復月地派飯、探獨居長者，令他有更深領會，「既然去探人哋嘅公公婆婆，點解唔同自己屋企人多啲溝通。你可以同人哋嘅公公婆婆溝通，你一定可以同自己嘅公公婆婆爺爺嫲嫲溝通，呢個想法我係想帶開。」

他認為獨居長者的問題會漸見嚴重，希望每個人都由自己做起，好好關心家中長輩，社會上需要探訪的獨居長者便會因此減少。





蟹妹：「我喺明哥身上學到「堅持」，好多嘢萬事起頭難，但佢堅持唔放棄。」

廚師「蟹妹」是義工隊其中一女將，約四年前與朋友加入明哥派飯的大家庭，自此這裏常見其身影，甚至一星期數天。

露宿者流連之處總予人污糟邋遢之感，但蟹妹卻從不嫌棄，「可能同我職業有關，唔覺佢哋污糟」。只是偶有露宿者擔心自己「冇飯食」而略帶急躁，她便淡定地好言相勸，「我同佢講：你瞓番喺你個位，我哋派緊過嚟，你瞓埋位，就會攞到。」

派飯已成生活一部份，蟹妹上午約朋友，下午4時半到來幫手，「朋友問我：你唔覺得做義工好悶咩？我唔覺，我唔係有錢人，我都係有力出力。」

與其他同路人一齊落手落腳做義工的蟹妹，明言從明哥身上學到堅持：「佢繼續做我哋就繼續做，唔會有停止嘅一日。」說罷，眼眶就紅了起來。





威哥：「明哥比較親力親為，跟佢學到幫人，覺得幫到人好開心。」


比較寡言的威哥，訪問中講得最多的就是「得閒就嚟幫下手」，但他一幫就幫了近10年，「因為我媽喺呢間舖做嘢，所以得閒就會過嚟」。

閒時沒有太多娛樂的威哥，放假多數玩玩手機遊戲，但只要聽到「唔夠人」，放假也即「挺身而出」，會否覺得很大犧牲？「我冇諗咁多乜嘢，心態係開心，幫到人都開心啲」。

每次外出派飯，威哥大多負責推車、維持秩序、執拾；從明哥身上，威哥悟出看似微不足道的，其實也可構成無限力量的道理，「我想自己有能力嗰陣都幫下人」。