曾經，情路坎坷。
曾經，備受非議。
今天，遇上對的人，做了對的事。
調整心態，戰勝低潮，重新出發！
此刻，被歸類為人生勝利組，不為過吧！
Coffee林芊妤，今天，到網上搜尋這名字，大多是瑜伽、修身，親子的相關資料。難以聯想到，曾幾何時，她彷彿總與負面新聞連上。眼前的她，抱着可愛兒子的「fit爆」潮媽，事業家庭兼備；一股幸福而自信的氣場，裝不了，也擋不住。
由藝人成功轉型為瑜伽及運動YouTuber，擁有70多萬訂閱戶的Coffee，上年年底還忽然多了雙重身份 ——人妻及人媽。她在社交媒體上公開跟兒子「伯伯」的生活點滴，更吸引了超過8萬粉絲追蹤。
「BB！No！唔可以打人！」「真係好好攬㗎！你知唔知啊？！」「哎吔！食頭髮！okok，繼續繼續……」這天，她帶着「伯伯」一起接受訪問，Lifewire及拍攝團隊無不分心、分身，甚至「瞓身」陪玩。時而扯髮、時而尖叫……大家都罕有地enjoy訪問不斷被中斷滋擾；受訪的媽媽，更樂此不彼。
「伯伯」秒殺8萬粉絲
很多人好奇為何Coffee稱兒子為「伯伯」?「因為佢好多縐紋，有時縐眉好老積，又好似我老爺，我覺得佢好似伯伯，咁就叫佢伯伯。」這位「伯伯」表情趣緻多變，配合圓渾深邃酒窩，加上米芝蓮車胎人身型，一舉手一投足，都秒殺眾生。
「但我多數都叫返佢做BB，係咪呀？BB……」說不到半句又再如連體嬰般摟作一團的兩母子，總如魔力般成攝影師的target；不難理解何以Coffee不自覺地為「伯伯」拍下海量照片，致手機儲存空間不足，不如索性為兒子開設社交媒體賬戶，記錄其生活點滴。
沒想到，「伯伯」的生活照招徠8萬多粉絲追蹤，成為BB界的網絡紅人。看着Coffee抱着兒子一臉滿足，總是「嘻嘻哈哈」，世界彷彿只剩他倆；然而，開朗幸福的背後，也需時過渡及疏理心理關口。
他+他 改寫人生劇本
「咁好嘅男仔應該唔係我嘅…」自言情路坎坷的Coffee，也許曾走過不少冤枉路；縱使真命天子岀現，甚至追問婚期，她也實行拖字訣，「佢個人ok、性格又好，可能遲啲都唔要我，我會諗好多呢啲嘢…」
事實上，由備受非議至成為健康時尚女性icon，Coffee確下了不少苦功。運動、工作，就是Coffee的全部，她只想專注為工作打併；皆因一切得來不易！誰知，前年卻意外懷孕；她的劇本，從此而改寫。
「剛有BB時都忐忑，當時事業好似起步得好好，開始多瘦身、健康產品搵我，好可能睇中我身形FIT。但有咗BB，身形咪走樣囉？」當刻，真命天子還加多句：「你本身都唔係瘦，你有BB就一定會變型㗎啦！」忠言也許逆耳，但倒也是肺腑之言。當時她給了自己很大的心理準備：會變師奶了！這對於藝人或瑜伽達人來說，是人生交叉點。
胎盤前置 情緒陷谷低
第二個始料不及，是胎盤前置。Coffee本想順產免留疤痕及影響做運動，當醫生提到順產的風險，如大出血、嬰兒或因胎盤影響呼吸等，Coffee為保胎兒，二話不說就決定開刀，自身的顧慮全拋諸腦後。
因為剖腹生產，Coffee花了較長時間才能復原，坐月期間，身體大不如前，「我明明係做開運動嘅人，但連起身都要人扶住。行又痛、餵奶又痛，又唔可以幫BB沖涼或換片……」自覺甚麼都做不來，加上分娩後受荷爾蒙影響，令她情緒一度陷入低潮。
調節情緒 建立新節奏
「死啦點算？係咪以後都係咁？」眼見自己的大不如前，Coffee自知情緒不穩，幸她不忘自我提醒，身體復原不能操之過急，別鑽進牛角尖，她不斷跟自己說：「聽日會比今日好，之後會越來越好……」經過好好休養，Coffee總算慢慢好轉了，「無論係餵人奶，湊BB，或身體狀況，都一日比一日好少少、好少少咁，所以我都同自己講，慢慢會熟習㗎喇。」
面對情緒關口，Coffee用正面和積極的心態面對，「每個人喺每個階段，都有唔同嘅節奏」，Coffee坦言突「升呢」為人母，「都有少少驚」，她能做的就是調節情緒，接受自己的新角色，適應新的生活節奏。
緊張媽媽 影響BB發展
Coffee慢慢走出陰霾，說到底，還得靠兩位暖男。「BB睇到媽媽嘅負面同正面，所以媽媽嘅情緒，絶對影響佢日後嘅發展。」對於一些媽媽過於緊張，令情緒受困，她認為「BB就算食少一餐、多一餐，或者少少唔舒服，都唔及成日見到媽媽愁眉苦臉咁，最緊要喺BB面前調節自己情緒好啲，咁就最好！」
「我好鬱悶呀！」Coffee坦言多得丈夫在身邊照顧和支持，不開心就會找他談。但她笑言︰「呢個時候老公最好唔好講太多嘢，喺身邊就OK，因為……女人會有少少Sensitive。」對的人陪伴在側，不用多言，足願矣。
不要埋怨 信自己所選
以前的Coffee：「覺得工作最緊要，任何阻止我做嘢嘅，都好黑人憎。」
現在的Coffee：「沒有任何嘢比BB更重要。」
小編羨慕她事業家庭兩得意，Coffee卻搖頭：「其實唔平衡㗎，我扮出嚟㗎咋！」她認為所有媽媽，定有不開心之時，「一定會有無咗嘅嘢！但我覺得要focus返係自己有嘅野！當你做嘢就盡情去做，唔好再睇Cam睇個仔，反而係要enjoy the moment！」
有得定必有失，她認為最重要是「究竟自己睇重邊樣？」既然選擇了，便接受自己所選。在職媽媽別埋怨孩子不黏你，全職媽媽也別怨沒了自由，她鼓勵媽媽們懂得珍惜所擁有，「心態好重要，唔好太過怪責自己，對生活不滿。」
「我想陪伴伯伯成長，佢係我嘅First priority，所以我要識分配時間，將工作取消或減少。」一般人認為BB總如樹熊般黏父母，但Coffee笑着自嘲：「而家係我黐身，唔係佢，無諗過自己係一個咁黐身嘅媽咪！」說罷，她又即樹熊上身。
感謝囝囝 找到著落點
回想當上媽媽前，即使有事業、有男友，但Coffee坦言內心仍感空虛，「心入面總有一部份未Fulfill到，直至成為了媽媽，感覺變得不一樣，「個心定咗好多，有個著落點。」她坦言這安全感是兒子給她的，「我覺得媽咪都要多謝小朋友，因為佢都令我哋成長咗好多，令到我哋好有安全感、好踏實！」
對於兒子的將來，Coffee沒有虎媽的高期望，只求孩子有個快樂童年，健健康康，可以做自己想做的事情。相比起物質或成就，她更在意囝囝的內在價值觀，希望他日可以和兒子一起做義工，「未諗到咁偉大，話要對社會有咩貢獻；但我哋要「知足」呢樣嘢要身教；宜家的小朋友太幸福，佢哋應該見下唔同嘅小朋友過緊咩生活；世界上有好多唔同嘅人，大家應該係去接受或者接納人哋同你嘅唔同。」
