pgview
/CheckIfDuplicatedEmail
/Lang
 
 
 
 
藝人張慧儀(Angie),曾跟性感掛鈎的名字;今天,她卸下華衣美服,獨力撫養患先天性心臟病的養子張晃維(Hanson)。近月,慧儀為籌Hanson逾百萬手術費,更被迫母子分隔。外人覺得她「偉大」,她卻謙稱:「唔敢當!」
 
 
 
 

一聲媽媽 觸動母性 

2006年,慧儀在北京福利院遇上Hanson,「第一眼見到佢,好可愛。知道佢嘅身體狀況後,就更覺得我要收養佢」。
 
不過,將慧儀全面「撻着」,還是Hanson的一句話:「佢兩歲幾,有次帶佢去食雪糕,忽然叫咗我一聲媽媽,觸動咗我裏面嘅母性,血脈沸騰,即刻覺得:我要抱佢返屋企」。
 
「我只能夠理解為緣份。」緣份,將沒血緣的人,牽成唇齒相依的同路人。
 
 
 
 

血氧低 嘴手均發紫

然而,兩母子的路,並不平坦。笑得率真的Hanson,手指、嘴唇均呈紫色,他雖一直開朗地逗小編玩耍,但見到樓梯或斜路便怕怕,「佢血液含氧量得70,等如高山症。佢唔可以做劇烈運動,唔可以太激烈跑,佢會好辛苦」。
 
花費於養子身上的心神及金錢,根本無法衡量,但重點是,Hanson的心臟病非一次手術可根治,「同醫生商量過,覺得佢宜家好好哋,暫時唔好理,等發完育再做手術,希望盡量減低手術次數」。
 
 
 
 

分隔異地 賺醫療費 

慧儀估計手術費隨時逾百萬,故必須儲備「醫療彈藥」,母兼父職的慧儀承認難以應付,幸寶貝仔想出辦法,「我問Hanson:若媽媽去拍嘢,請人返嚟照顧你,或你去人哋屋企住……佢竟答:『媽媽,我要返大馬同婆婆爺爺一齊,嗰度始終係我哋嘅家。』咁就皆大歡喜喇!我爸媽開心,我亦最放心!」
 
「冇得日日見,掛就梗喇,惟有日日傾電話囉!」笑得甜絲絲的慧儀,對於兒子懂性如此,讓她專注拍劇養家,非常安慰。「無論幾攰幾困難,阿仔就係我最大嘅叉電機!」
 
 
 
 

阿媽開心 我就開心 

感情路上,慧儀一直跌跌碰碰,如今帶着重病兒,不就成障礙?慧儀斬釘截鐵:「唔會!佢反而係幫我過濾,若對方唔接受Hanson,就唔係我要搵嘅人!」與其說是負累,不如說Hanson是其精神支柱,見媽媽受情傷,他心痛作安慰:「算啦,唔好唔開心啦!同邊個一齊唔緊要,阿媽開心我就開心。」
 
她坦言,身邊不乏追求者,惟不急於投入新戀情,「我唔係冇咗個A,即刻去搵個B。我宜家係媽媽,唔可以俾阿仔覺得『阿媽今日同呢個,冇咗,聽日又同嗰個』,我處理感情嘅方式,直接影響佢以後對婚姻、對愛情嘅睇法。而且阿仔話唔使媽媽同佢搵個爸爸;因為我媽媽就係最珍貴!」說罷,慧儀又不自覺甜笑。
 
 
 
 

「佢整定係我個仔」 

訪問期間,不難發現慧儀與兒子經常四目交投,Hanson稍微郁動,慧儀如「阿仔肚內條蟲」,洞悉一切,「佢一個眼神、一聲媽媽,就知道佢內心;我哋心靈相通。我好感恩,佢整定係我個仔,哈哈哈……」
 
Hanson在旁笑得開懷,似乎忘了「曳」時被藤條伺候;「我養得你,就要教你。」但每次打完,兩母子總哭着相擁,「喊完後,你眼望我眼,佢一定要我攬番佢、錫番佢」。
 
 
 
 

天使降臨 仿如重生 

曾經,每周來回番禺至廣州,「帶住自製飯盒,5點接放學,一上車即餵佢食飯,坐成個鐘車到廣州,開完晒會都9點幾;Hanson瞓咗覺,一手抱佢,一手拎公事包、手袋、書包、飯盒,好狼狽!甚至要帶住Hanson周圍揾生意……嗰陣最困難,但令我成長得好快,冇嘢再難到我」。
 
慧儀坦言,Hanson的出現儼如小天使,助她衝過每個難關,「佢係我嘅淨化劑,冇佢,我睇唔到自己好嘅特質……原來我係有責任感嘅媽媽,呢個係重生」。
 
 
 
 

如果我死咗 你會點? 

Hanson曾夢見親母,還崩潰哭起來:「如果佢想搵親生父母,咪同佢一齊搵囉,就當天畀我嘅使命同任務,我養大佢係我嘅責任,佢想嘅,我一定成全佢!呢個係我對佢最真最真嘅愛。」
 
對於將要追進行大手術,Hanson不諱言害怕,擔心昏迷,甚至不想做,「佢問如果有日我死咗,你會點?我話我會好難過,但我相信你會返上帝嘅身邊,去返天堂,我會好掛住你……」慧儀明白兒子恐懼,但覺得擔心不來:「所有嘢交畀個天,佢第一次做手術得四、五個月大,昏迷咗九個月,都可以再醒番,我相信我唔擔心,只係手術前盡量調養好身體。」
 
展望將來,慧儀對Hanson只有簡單的要求,「我期望佢做個有愛心嘅人,每一日好開心咁過、健康唔辛苦……希望佢知道媽媽有幾咁錫佢!」
 
 
 
 

慧儀心聲

「唔好過份『孝順』仔女,尤其單親家庭嘅父母,唔好經常覺得虧欠咗啲仔女,就喺物質上不斷滿足佢哋,或者過份地『孝順』。」
 
「我想同身體有缺陷嘅每一位小天使講,你哋係上帝派嚟嘅,有你哋嘅任務同使命,唔好放棄,一定要搵到自己嘅talent(天賦),你哋一定得!」
 
「要用心、用愛去同小朋友相處,你就會有力量。每一日都帶住陽光嘅心態,就覺得唔會咁困難。」
 
 
 
 
 
採訪及撰文:梁劍紅、王煜棋
攝影:Nichigo Mak
影片製作:Lifewire & Sam Chan
編審:梁劍紅
場地提供:MG Cafe
View Comment (0)
You must be a logged in contributor to comment.
下載護聯網消息