蘇浩才Sammy@Kolor 跑120K沙漠的Band佬

搖滾+跑步=蘇浩才Sammy@Kolor

Issue 28 Dec 2023

陷抑鬱兩年看不見盡頭

讀過罕病童的故事，Sammy 對困在疾病中的苦，有深刻體會。「依家諗返起，當時其實好辛苦。我食了兩年藥，好似……係咪永遠都係咁嘅呢？會唔會好返呢？」

從「圍城」跑到馬拉松，跑到沙漠，轉捩點正如Sammy 所說，「不少人開始跑步都是因為健康問題」，他也不例外。「身體唔好、情緒病，你諗到嘅係人哋唔開心或者好低落，但其實唔係，情緒病係好physical嘅嘢，你會心跳好快、會panic attack （焦慮突襲）、有啲人會心臟病。」Sammy彈着ukulele，回憶着十多年前的情況。

身為過來人的太太Candy盧巧音，勸身陷情緒黑洞的他去求醫，「醫生同我傾好多我嘅經歴，去挖你心入面啲問題出嚟，我慢慢發現，『咦！原來呢個病係有人幫得到嘅』。」他坦言當時令他最不開心的是際遇、對事業的焦慮。「加上又煙又酒，日夜顛倒，接觸嘅世界可能都係同一班人，大家都好負面。」

秘密忌見光最怕陰影放大 --《海底隧道》

身體內的憂鬱解藥：安多酚

面對事業的迷惘，醫生開啟他的新想法，「如果做音樂做得辛苦，你咪試吓唔好淨係對住呢啲嘢」、「不如你試吓做運動，因為會分泌安多酚，令你開心啲」。「我就試吓pick up運動，覺得要做自己覺得最辛苦嗰樣嘢，就迫咗自己揀最唔鍾意嘅跑步。」

他以自身經歷證明，情況一定會變好。「面對（病情）係難過放棄嘅。跑步絕對係解藥，好多嘢嘅解藥。我諗……就算呢個世界乜都冇，得番跑步都OK嘅。我好多謝個天畀機會我接觸到呢樣嘢。」

當天沒遇上今天情形會是哪樣 -- 《無雙》

由當年Kolor成員一起開始做運動，至今跑了11年。起初運動場一個圈也跑不完，「點解自己咁廢嘅？旁邊啲小朋友、阿婆阿公都快過你。我覺得好唔掂喎，要做啲嘢。」「的」起心肝練習，一個月後便可一口氣跑五公里。

「我覺得好神奇，原來跑步係咁嘅，好似突然間你會得嘅，咁我嗰陣時開始認真跑。」

初嚐10公里賽：跑完想死

有贊助商邀請他參加10公里跑，「我覺得：都好喎，又唔駛自己買鞋買衫，又再有多啲動力跑。」於是無師自通地苦練完成比賽。

「跑得好辛苦，跑完想死。但我從來無嗰個感覺：好似就嚟暈低，但都冇放棄，堅持去完成，嗰個滿足感好大，咁就開始上癮。」

從跑步領悟跳出舒適圈

如果要用一首歌形容跑步，Sammy會選擇英國搖滾樂隊Queen的《We Will Rock You》—兩者同樣簡單、不複雜，卻隱藏了一種推動力。另一個推動力便是「人」，眼見太太Candy跑了大約一年，跟教練練習個多月便成功挑戰全馬，啟發他挑戰更長距離。「佢少少夾硬來，但佢又跑到喎」，「原來係你要夠癲夠open先得嘅，野心原來要好強。」

加上遇上一些跑得之人，刺激他要跳出舒適圈挑戰自己。「唔止跑步，我覺得對我生活態度，或者待人接物、做音樂，都係一個好好嘅訓練。」

第一個馬拉松：抽晒筋

「我覺得10K呢，係人人都跑到，行都行得到。半馬就開始唔可以靠天才喇，全馬根本係設計出嚟，畀你唔能夠完成。你若要完成，就一定要經過訓練。」

「第一個馬拉松就係去紐約跑，好辛苦，廿幾公里開始已經抽晒筋，我捱到終點，但係現場好好氣氛。」

疫情期間他更開始跑山，與一班跑友數度完成「逆走100」(逆走麥理浩徑100公里的越野山賽)。「第一次跑完，好似俾人打咗一身咁，我第二三日都喐唔到。但人係好鬼犯賤，你越唔舒服，你就覺得越正喎。第二日瞓醒就開始喺group度問：下次玩咩呀？」

這班跑友來自各行各業，有政府工，有工程師，有醫生。大家起初都是不問出處只管跑，熟絡後才知大家職業。他感謝跑步讓他結識這班率真的朋友一起瘋狂。

兩年前，他用跑步把更多人連結--和教練朋友「世界越野錦標賽亞洲第一」「阿歹」（謝覺偉）成立跑會，希望令不想跑的人，也提起雙腿。跑會名字取自梁栢堅差不多10年前替Kolor寫的一首歌--「頑張」（加油）。

頑張再加率性別靜候別認命 -- 《頑張》

成立《頑張》「咦！你姓張㗎？」

「好多人問過我『頑張』係咩，有啲阿姐見到我件衫（頑張）呢，『咦！你姓張㗎？』。」頑張每周在深水埗運動場開跑，他自言自己做交際PR。「我負責叫人來，有些人說想來打卡，我話：得！你跑完就可以打卡。你唔跑就唔打卡。」由起初四五人，慢慢累積至百餘人，更組團到海外參賽。

「嚟得頑張跑，佢哋九成以前都係唔跑嘅。」有逾200磅的「肥哥哥」，現在鍛練至百餘磅，也有曾經中風的病人。「佢哋覺得：喂，我應該跑唔到㗎喇。我話：你落嚟行啦。行行吓，佢又變咗跑。」

「跑步呢樣嘢好神奇，當你自己一個人嘅時候，可能你唔會跑。但當有一班人喺度跑呢，只要旁邊的人唔停，你都唔會停，好羊群。」

結果那九成人，現在有些跑全馬、跑半馬、跑越野。有人更可在3 小時內完成全馬。「我覺得好神奇，原來有啲人嘅才華冇發掘過，但無端端就喺一個跑會裏掘咗佢出嚟。」他不住邊點頭邊說：「我覺得：嗯，我應該係做啱咗啲嘢。」

跑步與音樂互補空虛

訪問的這天，Kolor剛完成了3場演唱會，大量的精神體力消耗後，別人可能選擇休息一下，但他翌日便又再穿上跑鞋繼續跑。「對我嚟講，玩得多音樂，去做運動都係一種休息，互補空虛。你可以話係心理上嘅平衡。」

與隊友跑步的得著，除了看得見的結實肌肉、不斷破PB(個人最佳成績）；還被聽得見：歌迷在討論區大讚唱歌「勁好氣」、「唱live無得輸」。

「我發現好多跑步嘅特質，其實同做音樂一樣」。「就好似彈結他，開頭練習時，有啲人話：手起繭，好痛好辛苦。你一定要經歷咗呢樣嘢，先至會enjoy到玩樂器嗰個滿足感」。「你要不停強迫自己去做一樣自己唔想做嘅嘢，呢一種係訓練。」

沒有傷損怎發育健全從未傷風怎懂得取暖--《生於憂患》

將搖滾結合跑步

跑步與音樂，不是爭奪他精神和時間的對立；而是相輔相承的共存。「我以前創作可能係『吽』在studio裏，對住電腦迫自己諗歌。往往想出來的都是堆砌嘅嘢。」

「依家我好多歌都係跑步時諗，因為跑步係最冇嘢做。當我跑步時有個beat，例如《海底隧道》可能喺呢個beat度諗出嚟。」

「啱啱演唱會我要記30幾隻歌嘅歌詞，咁我咪一路跑一路記歌詞，一路唱，咁我又練埋氣。」

有些人每天要睡8小時；有些人每天要吃四餐；他則每天都要跑10公里。「我忙嘅時候就唔搭車，譬如要去商台做訪問，我做完就跑返studio。慳番時間，唔使特登抽兩個鐘出去跑步。如果嗰日唔跑，我就抑鬱㗎喇。」

挑戰120公里沙漠跑

今年11月，他到約旦參加HMDS超級馬拉松賽事，孭着裝備在沙漠跑120公里。賽前三個月，他都在中午孭着七公斤跑沙灘訓練，又增加20公里以上的長課。出發前，他自彈自唱了《圍城》送給罕病童，希望給大家堅持下去的信心：「每一個人都有生存喺地球上嘅天賦，好好利用佢，好好利用喺呢個世界上嘅時間，去完成一啲你想完成嘅事，人生咁就好富足，其實我哋全部人都係咁樣。」

過去了你那一雙手還有每晚每天的奮鬥汗血盛載這風光的背後 --《圍城》