pgview
/CheckIfDuplicatedEmail
/Lang

 

4月4日兒童節,許多小朋友都期待着收禮物;然而,有幾位長期病患孩子,卻趁這日子,拖着藝人河國榮哥哥逛街市,為的是親手炮製禮物,報答父母。


梓鍵、曉進、靜嫻、皓翔,他們有的坐輪椅、有的行動不便;但,為感激父母長年累月的悉心照料,身體上的缺陷,都阻礙不了他們的決心,齊齊「落手落腳煮大餐」回饋爸媽!


《河+細路煮飯仔》,Go!Go!Go!

 

河國榮

 


當曾自稱「最叻係煮即食麵」的「真‧香港人」河國榮,遇上幾乎未曾入廚的病童時,會產生甚麼化學作用?任務展開前,河國榮先來一個「gag」跟大家混熟,「我最叻係煮白飯同煎蛋」,患脊柱側彎的皓翔不甘示弱,「我識雞蛋炒飯」!患杜興氏肌肉營養不良症的梓鍵、及黏多醣症4型患者曉進則不慌不忙的仔細部署。

 

「我要拋鑊!」活躍的皓翔拿起枱上的「煎pan型」食物盤表演,為晚上的《煮飯仔》預演其拿手絕技。

 

河國榮

 

 

河+細路 齊齊買餸

經過約一小時的「會議」,……「大家ready未?」「出發!」河國榮隨即與病童「轉戰」啟田街市,不過「靜靜覆診未到,我哋幫佢買嘢,好冇?」「好!」


不消45分鐘,番茄、大蝦、意大利粉、雞蛋等食材已成為這班「煮角」的囊中物,多個環保袋裝得滿滿。靜靜亦在購買食材尾聲時出現,四位「小煮角」終於齊人──《河+細路煮飯仔》正式開始!

 

河國榮

 

河國榮


四個細路六碟佳餚

「睇下大家整乜嘢食先?!」
皓翔:「第一款係意大利麵,加啲番茄同蔥;第二款係粟米炒豬肉。」
梓鍵:「我煮茄汁炒蛋大蝦。」(編按:最終變成番茄炒蛋及煎蝦碌。)
曉進:「餐蛋米線。」
靜靜:「我整麵,有雞蛋、腸仔同菜。」

 

四個細路六碟佳餚


「小煮角」的「溫暖牌」

「國榮哥哥,可唔可以幫我哋洗嘢?」面對四位「小煮角」的請求,河國榮有求必應,一時洗菜一時切蔥,見梓鍵切番茄更忍不住出手,「手指唔啱呀,你咁樣擺咪會切到自己手指」。

 

河國榮

河國榮
河國榮

備料完成,開爐喇!皓翔、梓鍵率先上陣,煎蝦、炒番茄、煮意粉……儼如「天生食呢行飯」,河國榮則從旁提點,初次合作已相當合拍。

 

未幾,到曉進及靜靜大顯身手。曉進雙手雖已變形乏力,但無阻他煎蛋煎午餐肉,為媽媽送上「溫暖牌」米線;靜靜更儼如「女廚神」,從容不迫地完成為爸爸預備的腸蛋菜麵。

「有邊個唔係100分?!」

擾擾攘攘3小時,「感恩大餐」終於出爐……爸媽們都一臉滿足,「好味、好食」之聲不絕於耳,梓鍵則緊張追問國榮哥哥,他的煎蝦碌值幾多分?
「你啲蝦冇搣殼喎,不過有殼好睇啲。」
「有殼可以鎖住啲味嘛!」
「邊個教你?」
「一入廚基本就要識。」

 

河國榮

河國榮

河國榮:「有邊個唔係100分?!全部有心,又整得好食。」誠然,四位「小煮角」的廚藝及心意盡收父母眼底,甜酸苦辣也盡在不言中。《河+細路煮飯仔》也在幸福溫暖氛圍中宣佈圓滿結束……

「係無厘頭嘅懲罰」

第一次跟罕見病童相處半天,河國榮坦言感受甚深,「你畀時間同佢哋傾偈,你會睇到;佢哋啲困難好多係解決唔到,但佢哋嘅思想同個腦係正常,對嗰個人係好辛苦」。

 

「佢哋有少少似我爸爸。」河國榮想起患柏金遜症的父親,思想雖正常,但身體及肌肉卻一直萎縮,「溝通唔到,因為講唔到、食唔到、行唔到,身體好似出賣咗你自己,係極之辛苦。會越來越差,我覺得係一種折磨,我覺得好唔fair(公平)」。

 

河國榮

 

「最辛苦係佢幾十年來,唔會有半個鐘休息或偷懶,做慣咗,佢一生都係咁勤力,唔會嘥一分鐘,跟住柏金遜出現,佢做唔番以前嗰個咁勤力、咁精神嘅人,好似一種懲罰,但係一種無厘頭嘅懲罰。」想起父親,河國榮不住感概。

 

 

我好自私 唔可以走

爸爸雖患頑疾,河國榮卻承認暫沒返澳洲長伴老父的想法,「有啲人話你差啲死咗,你就會珍惜生命;都唔一定嘅,始終人係好難轉變,你慣咗咁嘅生活、咁嘅做法,就算有乜嘢大件事未必會變。我好自私,我喺香港仲有嘢要做,唔可以喺呢個時候走」。

 

話雖如此,但多了溝通卻是事實,「盡量每星期傾一次視像電話,佢哋想見你嘛。盡量安排……坐飛機返去,見下佢哋,因為父母最重要係見到你」。縱使分隔多遠,他還是爸媽「肚裏面條蟲」,深知父母所需所想。

河國榮
河國榮

 

「有今日就享受今日」

或許,父親的病令河國榮體會到「得快樂時且快樂」的道理,尤其罕見病童一般壽命有限,「如果你醫唔到但時間有限,咁點好?你有兩個選擇,一個係傷心生活落去,一個係盡量開心生活落去,你有今日就享受今日,你有聽日就享受聽日。有啲人可能覺得難聽」。

 


他並非「講風涼話」,他家中的年邁病狗,令他感慨良多,「我有隻狗狗17歲,行唔到路,你享受同佢一齊嘅時間,盡量去開心生活,冇其他選擇,你唔開心、傷心,對全家人都冇好處」。

 

「好似我哋啲狗狗,醫生都講quality of life(生活質素),你畀佢開心食到佢想食嘅嘢、開心玩到佢想玩嘅嘢,佢個生命可能短少少,但係開心嘅,人都係一樣。」
河國榮的狗

河國榮

港人太忙 關心太少

病童心態固然重要,但政府對罕病童的支援是否足夠,讓他們像一般人一樣去追夢呢?「呢個問題係炸彈。」不過河國榮隨即化身「拆彈專家」,以養狗為例解答這難題,「一隻狗背脊出問題要做手術,講緊8萬、10萬,做完之後佢行得番,剩番兩三年命可以同佢開心;但嗰8萬蚊畀20隻喺狗場生活嘅狗狗,資助佢哋嘅食糧、租金。一隻狗狗嘅支出等於20隻狗狗嘅支出,係感情嘅問題」。

 

不過他認同解鈴還須繫鈴人,「要鼓勵政府去資助呢批人,同埋快啲批准藥物可以入香港,畀到呢啲小朋友。始終呢啲少見嘅病,你畀心機去幫佢去醫佢,會發現新嘅嘢關於人嘅結構,對人類將來都有幫助」。


政府的決策我們無法改變,但能否教育大眾呢?「好難,佢哋太忙,要搵食。你只可以同呢啲小朋友多啲宣傳,等大家知道有啲係絕症,就算唔係絕症,生活都好辛苦。有藥物可以幫佢,不過好貴」。

 

 

另類打氣籲「珍惜

面對病患朋友,我們常以「明天會更好」、「支持你呀」作勉勵,看似能帶來鼓舞,但河國榮卻不甚認同,「你喺嗰個情況裏面,同人哋喺旁邊睇住你,係兩件事。你日日對住嗰個問題、嗰個病,24小時對住嗰樣嘢,唔同㗎」。

 

所以他以另一種心情為病童打氣,「你哋個個都好特別,個個都有自己嘅特色,個個都係非常nice,大家要珍惜對方,珍惜一齊嘅生活,最緊要嘅係,你可以開心嘅話,一定要盡量開心,畀心機!」

 

 

真‧香港人 真‧愛唱歌

「同熱愛這片土地 大家刻骨銘記 愁或喜 生與死 也是香港地」《香港地》的歌詞,不但讓人見識河國榮的Rap歌功力,也唱出他的心聲。

 

「我嚟咗香港31年,未試過有1秒考慮走。解釋唔到,我鍾意香港,我家在香港嘛!」這段在港的日子,河國榮最令人印象深刻的,莫過於他在電視劇中的的警司或神父形象。
香港地

 


《亞視永恆》續歌唱夢

不過,無論電影、電視劇及舞台劇有多吸引,他的最愛始終是……「唱歌囉。挑戰大嘅,好似6年前準備出唱片,我去LA(洛杉磯)錄音,一落機喉嚨發炎,出唔到聲,錄唔到音。到宜家都有好多意外、好多嘢阻住我唱歌、出唱片」。

正當河國榮準備放棄,決定「封咪」時,「突然有人問我可唔可以唱《亞視永恆》,世界唔畀我停,呢個係運氣」。一首網絡改篇歌,延續了河國榮的「歌唱夢」。

由《亞視永恆》唱到《真‧香港地》,台上的他表現鎮定、從容不迫,但有誰知道他內心的恐懼呢?「之前因為健康問題,喺台上唱歌會好緊張、會有恐懼症。恐懼係惡性循環,你記得上一次驚,今次都會驚……我試過食藥,減低個緊張性,食少少,慢慢唔記得咗驚嗰個感覺」。
河國榮


唱歌甩嘴要原諒自己

《真‧香港地》連香港人都覺得「繞口」,究竟「鬼佬Rap廣東歌」是如何練成呢?「記得唱《亞視永恆》嗰晚,3,000個觀眾喺度歡呼,好開心;唱《真‧香港地》係冇時間睇歌詞,太快,嗰晚真係畀心機去洗腦。」

 

 

河國榮認為只要盡力做,即使演唱時「甩嘴」也問心無愧,「我試過接咗個job,甩字甩咗三次四次,惟有原諒自己,笑住盡量唱落去,你盡咗力。如果你兩三個星期唔學唔練,跟住你失敗,咁係你嘅事。如果你盡咗力去學去練,而你都係甩字,你接受啦,你盡咗力」。

 

河國榮

 

 病魔纏身 樂觀打勝仗

「我係樂觀嘅,有時會有啲失落,都會有少少絕望,但大致上都係樂觀。」樂觀,或許是河國榮勇抗病魔的靈丹妙藥!

 

近10年,河國榮差不多每日都在「打仗」,抑鬱症、右耳基底細胞癌及胃酸倒流等……但頑強的意志,加上樂觀嘅心態,讓他每場仗總能凱旋而歸。

 

不過他提到,胃酸倒流一度影響他的聲線,「胃酸倒流係你瞓覺時,胃酸上嚟通宵浸住你聲帶,你瞓醒嗰陣聲帶係腫咗,唱歌會沙聲,同埋會走音。你好鍾意唱歌,同埋你有你嘅標準,呢樣嘢係好難接受」。

 

至於抑鬱症,更加困擾他長達七年,「當時寫緊電腦程式,每日寫10幾個鐘,每日瞓3個鐘,持續咗4個月,身體就反抗、負荷唔到,所以荷爾蒙失調」。他最終選擇不靠藥物,透過調節及休息,令荷爾蒙逐步回復正常。

 

河國榮

「河+細路」小檔案

河國榮(52歲)

國籍:澳洲
學歷:醫科生(新南威爾斯大學)
曾演出角色:神父、法官、警官、機師等

 

羅靜嫻(13歲

病症:龐貝氏症

菜式:腸蛋菜麵

 

莫皓翔(10歲)

病症:脊柱側彎

菜式:番茄意粉、粟米炒肉粒

 

陳梓鍵(10歲)

病症:杜興氏肌肉營養不良症
菜式:番茄炒蛋、煎蝦碌

 

蕭曉進(7歲)
病症:黏多醣症4型
菜式:餐蛋米線

 

 

 

採訪及撰文:梁劍紅、王煜棋
編審:梁劍紅
硬照攝影:Colin Lam
影片製作:Lifewire、Sea.Pho.Yea、Bobby Wong

場地:KIDZTROPOLIS

 

View Comment (0)
You must be a logged in contributor to comment.