pgview
/CheckIfDuplicatedEmail
/Lang

 

後母,是爸爸再娶的女人、沒血緣關係的家人。
後母,是童話故事裏的惡毒母親、刻薄繼子女的壞人。
後母……必然是負面的代名詞?
看看他們的故事,或許,你會重新定義。

 

 

提到藝人楊卓娜,大家可能會想到《愛‧回家》的「霞姐」、《BB來了》的「金牌陪月員」,還有花一個月親手為妹妹楊怡造結婚擺設的好姊姊;形象「入屋」討好,為人喜愛。現實中,她同樣演活照顧孩子又兼顧事業的人母角色,還將「後母」一職重新演繹。

2009年,卓娜下嫁已有兩女兒的「廣告燈箱大王」楊志翹,即成人妻及繼母;同年,三女舒然(豹豹)出生;一家五口,沒有《灰姑娘》童話的嫉妒與魔咒,只有「我好愛你」的永恆法則。

 

 

 

冇機心的大頭蝦媽媽

「畀我瞓多陣啦……」
「我又唔記得帶鎖匙喇,可以拎落樓下畀我嗎?」
「出門口要返轉頭三次……」
訪問剛開始,大女舒婷及次女舒雅便急不及待「數」眼中的媽咪,但這個被講壞話的媽咪,卻連番笑着點頭,十分受落。舒婷:「阿爸成日叫我哋睇住媽咪,要我哋照顧佢,媽咪係一個好冇機心嘅人。」說罷,四人又笑得摟作一團。

 

 

眼前的卓娜,跟其大部份所演的角色差無幾,樂天知足,笑得開懷,沒擺起「阿媽」款,反像閨密相處般。訪問時更玩上角色扮演,示範家中日常、更對調角色,笑聲不絕。舒婷說:「佢最難得嘅,係會分享自己唔開心嘅嘢,同我哋一齊討論。」舒雅:「同媽咪相處真係好似朋友咁,有咩就講,可以好直接。」 

 

 

「我都完全冇諗過要喺佢地心目中硬塞一個媽媽嘅形象。」與其嚴厲地以長輩身份管教,她更喜歡一家人直接「攤出嚟講」。難怪當女兒被問及眼中的媽媽時,三女毫不猶疑直呼:「慈母!」

 

 

 

享受吵鬧 製造『事端』


卓娜性格率真,認為一家人要融洽,先要嘈吵得起,直接說出心底話,沒有掩飾,吵鬧完又和好,才是一家人。「佢哋成日都會窒我,我又會嘈返佢哋,爸爸有時都忍唔住話:你哋嘈完未?其實我好享受,好開心。」

 


製造「事端」成了一家人溝通的法門。「我哋會多溝通,成日見面,見唔到面都要喺WhatsApp製造『事端』,將問題直接講出嚟。」 

 


理解和溝通,令一家的關係絲豪不受損,即使外界「再婚影響小孩成長……」等等閒話難免,亦無損一家親厚穩固的情感。舒婷說:「佢(卓娜)點對你,外人係唔知,亦唔需要知,自己知道就得喇。」

 


卓娜原是兩女兒的手工藝老師,三人相識在先,她由老師變成母親,「劇情」發展自然舒服,舒婷坦言:「唔係爸爸突然帶個女人返嚟話:『呢個就係你阿媽!以後叫媽媽』。而係我哋識佢先,已經相處過,同埋嗰時我雖然好細,但都唔想爸爸以後自己一個人。」

 

 

 

肉緊攬錫 愛要說出口

要培養及維繫全家人感情並不容易,卓娜的必殺技倆是------常跟家人說「我好愛你」。「我覺得係好發自內心!我成日都會攬住佢哋,得閒又錫一啖,有好多身體接觸。」當女兒們真心感到愛,便自然懂得去愛對方,幸福並不需要刻意製造。



舒婷笑說:「佢(卓娜)會係咁問你,鍾唔鍾意我呀?LOVE ME?好似小朋友咁,要我哋即刻答返佢。」較內歛的舒雅面對媽媽經常突如其來的「肉緊」熊抱,笑言「唔好太過激進,唔好攬到我抖唔到氣都OK嘅。」

 

卓娜真心對待每個家人,包括家中愛犬,即使三女兒舒然出生後亦不偏私。「她還很照顧爺爺嫲嫲,很關心老人家。」大家姐舒婷搶着數出媽媽的優點。

image


爸爸是「帆」 媽媽是「船」

於卓娜而言,家庭就像一艘船,爸爸是「船帆」,掌握着這個家的方向;媽媽是「船身」,保護「船員」的安全。「首先媽爸嘅感情要穩固,有良好嘅關係,先畀到小朋友快樂、健康成長嘅基礎,咁佢哋明咩叫愛,人生先搵到自己嘅方向。」

 

「我哋一齊著白色…」「呢對襪唔襯…」「我幫你整好啲先…」細心審視着三位「船員」的各樣細節,由女兒的臉色到幾絲垂下來的秀髮,這位媽媽都一絲不苟,呵護備至;正正體現出他們常掛在口邊的「好有愛」。

 

 

「我唔係100分嘅媽媽。」

自言追求完美的卓娜,有時因工作繁忙,未能陪伴女兒成長的每一步,不免耿耿於懷;惟有盡可能地做到最好。尤其舒婷踏入成長期,也曾出現反叛、磨擦;舒雅則內向兼不善表達;三孩子性格各異,如何恰當處理,成媽媽的挑戰。

 


當問及與女兒相處的感動一刻,不到第三句,舒雅彷彿已掌握到眼淺的媽媽又「嚟料」;拍着媽媽肩膊:「喂!忍住忍住…」卓娜還是忍不住邊哭邊回憶;然而,流出的眼淚,是開心的。

 


「最深刻一次,係鬧完之後,佢(舒婷)同我講對唔住,呢種感覺係……真係母女,佢畀我鬧得,但又會同我講對唔住,係好認真咁講……呢啲係屋企人真正嘅關係。」

 

 

 

母女互窒 enjoy犯賤

全心為女兒好,卻生怕自己期望太高反惹她們生厭。舒雅說:「媽咪可能因為後母呢個身份,成日對自己嘅地位冇安全感。所以會做好多嘢去肯定我哋嘅關係,可能佢鬧完又好驚我哋會憎佢。但其實唔會,我哋兩個一早已經當佢係屋企人。」舒婷不住點頭認同,「我有時都話媽咪好吟沉嗰啲,但心裏面覺得其實真係好好,就算幾煩都好,都好多謝你呢一個人喺屋企。」


卓娜破涕為笑,「佢哋成日窒我,其實我好enjoy喎,好犯賤!我好開心佢哋話:「哎呀你好煩呀!」乜都要直接、唔需要掩飾,好似姐妹咁。佢哋成日都會啫住我、我又會啫住佢;爸爸就會話:嘈完未呀你哋!係好開心嘅!」

 

 

 

 

母親節的雙重意義

今年母親節,他們全家人也會一起慶祝。其實,母親節對卓娜來說,別具意義,因為三女兒舒然的出生,就在2009年的母親節前夕,卓娜揚言是最好的母親節禮物;「係好大嘅恩賜!」

母親節,也是一家人為舒然慶生的日子,卓娜喜歡與家人共聚,於家中開派對,她還不忘稱讚女兒的心思,「兩個家姐好叻畫畫,佢(舒然)又會畫下咁。大家會整卡、整手工送畀我,我已經好開心㗎喇。」

幸福,並沒公式;每個家庭,都有專屬的一套幸福定義。惟可以肯定的是,能有真心愛你的家人、還有家人值得你無私付出……就是無價的幸福。

 

 

 

採訪、撰文:張文意、梁劍紅
編審:梁劍紅、Avy Ip
攝影:Sea.Pho.Yea
影片製作:Lifewire、Sea.Pho.Yea、Aaron Lau

鳴謝:Studio Tree


* * * * * * * * * * * * * * *
如欲捐款予指定個案/籌募活動,請下載「捐款表格」。
 
100港元或以上的捐款可申請免稅。
如欲索取捐款收據,請下載「申請捐款收據」表格,
填妥後並連同銀行入數紙副本或支票,電郵至info@lifewire.hk或寄回本會。
* * * * * * * * * * * * * * *
View Comment (0)
You must be a logged in contributor to comment.