遇上天使张慧仪：佢整定系我个仔

17 Mar 2017

遇上天使张慧仪：佢整定系我个仔

艺人张慧仪（Angie），曾跟性感挂鈎的名字；今天，她卸下华衣美服，独力抚养患先天性心脏病的养子张晃维（Hanson）。近月，慧仪为筹Hanson逾百万手术费，更被迫母子分隔。外人觉得她「伟大」，她却谦称：「唔敢当！」

一声妈妈触动母性

2006年，慧仪在北京福利院遇上Hanson，「第一眼见到佢，好可爱。知道佢嘅身体状况后，就更觉得我要收养佢」。

不过，将慧仪全面「挞着」，还是Hanson的一句话：「佢两岁几，有次带佢去食雪糕，忽然叫咗我一声妈妈，触动咗我里面嘅母性，血脉沸腾，即刻觉得：我要抱佢返屋企」。

「我只能够理解为缘份。」缘份，将没血缘的人，牵成唇齿相依的同路人。

血氧低嘴手均发紫

然而，两母子的路，并不平坦。笑得率真的Hanson，手指、嘴唇均呈紫色，他虽一直开朗地逗小编玩耍，但见到楼梯或斜路便怕怕，「佢血液含氧量得70，等如高山症。佢唔可以做剧烈运动，唔可以太激烈跑，佢会好辛苦」。

花费于养子身上的心神及金钱，根本无法衡量，但重点是，Hanson的心脏病非一次手术可根治，「同医生商量过，觉得佢宜家好好哋，暂时唔好理，等发完育再做手术，希望尽量减低手术次数」。

分隔异地赚医疗费

慧仪估计手术费随时逾百万，故必须储备「医疗弹药」，母兼父职的慧仪承认难以应付，幸宝贝仔想出办法，「我问Hanson：若妈妈去拍嘢，请人返嚟照顾你，或你去人哋屋企住……佢竟答：『妈妈，我要返大马同婆婆爷爷一齐，嗰度始终系我哋嘅家。』咁就皆大欢喜喇！我爸妈开心，我亦最放心！」

「没得日日见，挂就梗喇，惟有日日倾电话啰！」笑得甜丝丝的慧仪，对于儿子懂性如此，让她专注拍剧养家，非常安慰。「无论几攰几困难，阿仔就系我最大嘅叉电机！」

阿妈开心我就开心

感情路上，慧仪一直跌跌碰碰，如今带着重病儿，不就成障碍？慧仪斩钉截铁：「唔会！佢反而系帮我过滤，若对方唔接受Hanson，就唔系我要搵嘅人！」与其说是负累，不如说Hanson是其精神支柱，见妈妈受情伤，他心痛作安慰：「算啦，唔好唔开心啦！同边个一齐唔紧要，阿妈开心我就开心。」

她坦言，身边不乏追求者，惟不急于投入新恋情，「我唔系没咗个A，即刻去搵个B。我宜家系妈妈，唔可以俾阿仔觉得『阿妈今日同呢个，没咗，听日又同嗰个』，我处理感情嘅方式，直接影响佢以后对婚姻、对爱情嘅睇法。而且阿仔话唔使妈妈同佢搵个爸爸；因为我妈妈就系最珍贵！」说罢，慧仪又不自觉甜笑。

「佢整定系我个仔」

访问期间，不难发现慧仪与儿子经常四目交投，Hanson稍微郁动，慧仪如「阿仔肚内条虫」，洞悉一切，「佢一个眼神、一声妈妈，就知道佢内心；我哋心灵相通。我好感恩，佢整定系我个仔，哈哈哈……」

Hanson在旁笑得开怀，似乎忘了「曳」时被藤条伺候；「我养得你，就要教你。」但每次打完，两母子总哭着相拥，「喊完后，你眼望我眼，佢一定要我揽番佢、锡番佢」。

天使降临仿如重生

曾经，每周来回番禺至广州，「带住自制饭盒，5点接放学，一上车即餵佢食饭，坐成个钟车到广州，开完晒会都9点几；Hanson瞓咗觉，一手抱佢，一手拎公事包、手袋、书包、饭盒，好狼狈！甚至要带住Hanson周围揾生意……嗰阵最困难，但令我成长得好快，没嘢再难到我」。

慧仪坦言，Hanson的出现俨如小天使，助她冲过每个难关，「佢系我嘅净化剂，没佢，我睇唔到自己好嘅特质……原来我系有责任感嘅妈妈，呢个系重生」。

如果我死咗你会点？

Hanson曾梦见亲母，还崩溃哭起来：「如果佢想搵亲生父母，咪同佢一齐搵啰，就当天畀我嘅使命同任务，我养大佢系我嘅责任，佢想嘅，我一定成全佢！呢个系我对佢最真最真嘅爱。」

对于将要追进行大手术，Hanson不讳言害怕，担心昏迷，甚至不想做，「佢问如果有日我死咗，你会点？我话我会好难过，但我相信你会返上帝嘅身边，去返天堂，我会好挂住你……」慧仪明白儿子恐惧，但觉得担心不来：「所有嘢交畀个天，佢第一次做手术得四、五个月大，昏迷咗九个月，都可以再醒番，我相信我唔担心，只系手术前尽量调养好身体。」

展望将来，慧仪对Hanson只有简单的要求，「我期望佢做个有爱心嘅人，每一日好开心咁过、健康唔辛苦……希望佢知道妈妈有几咁锡佢！」