现年四十的文凤(Janice)自出娘胎就患有严重血管肿瘤，更扩散至脾、肝、腰骨、颅底骨，「身体每一个地方都随时有肿瘤，但我（事前）唔知，到痛就知扩散到嗰到。」

「右脚大脾以下全部系肿瘤，我截肢个位切咗成个橙咁大嘅肿瘤出嚟。」2005年，文凤切除右脚；五年后，血管瘤扩散至脾脏，「脾脏涨大咗三倍，食唔到嘢，不断呕……」最终整个脾脏也不保。

常定睛跟人交谈的文凤，其实因中度弱听而需非常专注，「正常人系20分贝以下就听到声，但我系50至60、甚至70分贝先听到，形成我讲嘢唔正，某啲字我发唔到音。」


治疗如行刑 返学被排挤

「好多人最开心系童年，但我最唔开心就系童年。我成日喊，系一个大喊十。」文凤5岁丧母，加上父亲患严重眼疾近乎失明，自小由兄姊照顾，且常入院治疗，「物理治疗师拉直我只脚，好似行刑咁痛」。

文凤坦言，留院时间比在家及学校更长，而每次回到校园，心情只会更沉重，「我唔多时间返学，佢哋唔太识我，唔知点同伤残人士相处，会笑我、虾我，我感觉被冷落、没人理。」加上跟不上教学进度，令文凤更不想上学，慢慢变得自卑，「开始收埋自己，好懦弱，成日唔讲嘢，只会点头同拧头。」

 

返工手脚慢 但揾番自己

童年在岁月中褪色，19岁的文凤在「社会大学」渐渐寻回信心，「我唔可以再收埋自己，我不断学习，慢慢喺工作中揾番自己。」「攞文件、用具，健全人做8个钟，我可能要做12个钟。」庆幸身边有一班谅解她的同事，「同事好关心，成日问有咩帮手、唔舒服要出声，几窝心！」

2005年，文凤迎来人生的大冲击──切除右脚，「啱啱着义肢，企都企唔到，坐喺地下喊咗好耐。谂番义肢矫型师话系我戴义肢行，唔系义肢带我行」。经过一年努力，终成功用义肢行路，没料到，这只是起点。


初试跑步 感受速度快感

「义肢矫型师问我有没谂过跑？我话没谂过，我行都行得唔系好好，点跑呀？想像唔到我可以跑。」在义肢矫型师帮助下，文凤成为本港首名「刀片人」，「喺跑步机上用刀片脚试跑，原来比正常人行快少少嘅感觉，好满足！」

终于能「脚踏实地」，文凤更尝试挑战不同运动，游水、攀石、行水、踩单车等，「我大腿截肢，需要比正常人付出多七倍气力去完成，如果我突破到自己，系好大嘅激励同提醒！」

挑战马拉松 得天使帮忙

挑战自己，不但需要勇气及决心，也得靠「天使」帮忙，「行山有行山教练，踩单车有单车教练，跑步有陪跑员。我能够做到每样运动，都要经过改装，用心思去配合，先可以完成到。」

文凤以渣马10公里赛为例，一般跑手两小时内已能完成，「但我用尽气力、尽量唔停，都超过两个钟。譬如第一年去到5公里，只脚开始无力，陪跑员畀食物我补充体力；去到7公里，我条腰嘅肿瘤痛，距离终点仲有3公里好遥远」。幸陪跑员不断矫正其跑姿，加上临近终点前的气氛，令她成功冲线。


随时瘫痪 把握享受每天

「每一个运动都会令我好辛苦！」文凤坦言接驳刀片脚的位置，会因发力跑而起泡，甚至流脓水；而长期戴义肢也易生肉疮，但她从不放弃，「当一班人支持你，你系唔想放弃：『点解人哋咁支持我，我都要放弃呢？』过程好辛苦，但成功感系大过辛苦」。

体内肿瘤不断扩散，位于腰骨及颅底骨的肿瘤倘压到神经线，文凤随时瘫痪，但她乐天知命，「每一日都系赚番嚟！我宜家都活过20岁，身体明显比以前好。我净系知而家我仲可以玩运动，我可以好好活着，我就把握同享受每一日」。


唔系唔想行 系我行唔到

病患并未磨蚀文凤的斗志，反而旁人的无情话，却刺痛心扉。

有一年一家人上山拜祭妈妈，文凤因行动不便需哥哥背着上山，途人竟冷冷的说：「你咁大个人，好心自己落地行。」文凤伏在哥哥背部嚎哭，哭得哥哥的背嵴湿透，「唔系我唔想行，系我行唔到，心酸嘅感觉好大，但途人唔明白。」

截肢后，文凤为方便穿戴或脱下义肢而穿上短裤，岂料邻居说：「你着长裤好好睇，唔好着短裤喇，会吓亲小朋友。」亦曾有人因回头望着文凤的义肢，差点「撞柱」。


义肢不普及 藉比赛推广

面对冷嘲热讽或奇异目光，幸文凤自有一套解读，「我由细到大都系伤残人士，我容易消化到，后天伤残嗰种难堪感觉更大」。她更明白，为何截肢者宁愿长期穿上长裤遮掩，也不愿面对世俗眼光。

文凤认为，义肢的不普及，令社会产生更多不理解，「义肢都系一种辅助工具，好似轮椅、手叉或助行架，点解义肢有人望呢？」所以她透过参加马拉松、三项铁人等赛事，希望让大众认识义肢以及截肢者的能力。

 
热爱陶瓷 手艺传残障童

「我好钟意陶瓷，由一嚿泥变做一件器皿，睇番我哋嘅生命系咪都系咁，真系好奇妙。」出自文凤一双巧手的作品曾扬威日本，令她甚有成功感；她更曾亲手做一只陶瓷义肢送给义肢矫型师为礼物，「陶瓷训练我嘅耐性、专注，你好专注去做嗰样嘢，先会做得靓」。

她更将陶瓷比喻为人生，「你唔系一出世就一定好幸福嘅环境或者身体，当我经歷过病患、多次手术，復康过程睇到屋企人嘅关心、朋友对我嘅爱，我嘅正能量会大咗。」

文凤不但将自己的陶瓷手艺教授伤残小朋友，更不断做义工，终于2014年夺得「杰出义职奖」，「呢个奖好多人参与，着重你用心去做义务工作。我用我嘅经歷感受去探访、分享点去面对困难，帮到同路人喺低处时有盼望，攞到呢个奖我好开心、好荣幸」。


刀片脚回弹力大

文凤右脚上的膝关节能配合运动功能，跑步时只要脱下日常用的义肢，换上C字型「刀片脚」即可。刀片脚配有鞋底，着地点小，回弹力大，价值XXX。而文凤所用的膝关节加义肢共3万多元？。

我喺医院长大，经歷过唔同治疗、感受过当中嘅痛苦。希望每一位而家接受紧治疗同克服紧困难嘅朋友，唔好放弃自己，积极面对困难，我哋嘅困难总会跨过，希望大家有精彩而美丽嘅人生。
 

守护天使：陪跑系我嘅荣幸

Eddie是文凤跑步时的护航员，自言若不是文凤，也「的唔起心肝」跑渣马，「咁辛苦、人又多，又咁早…….但有机会畀我陪佢跑，我觉得系好好嘅支持！」

曾两次陪文凤完成渣马的Eddie，犹如文凤跑道上的「守护天使」，「比赛有好多人，其他跑手睇唔到佢，或者想爬佢头，我就会前后留意，唔畀啲跑手咁接近。」

「我要多谢文凤畀机会我同佢一齐完成赛事，呢个系我嘅荣幸！」

 

 

採访及撰文：梁剑红、江依霖

编审：梁剑红、王煜棋

摄影：Nichigo Mak

影片制作：Lifewire & Lok Production