21 Dec 2016
極地人生 跑出助人之路
Steve's Profile （已婚，育有一女）
| 日期 | 完成賽事 |
|---|---|
| 2012年4月 | 撒哈拉沙漠250公里賽 |
| 2013年4月 | 北極42公里馬拉松 |
| 2014年5月 | 台灣50公里超級馬拉松 |
| 2014年6月 | 意大利高原雪山119公里超級馬拉松 |
| 2014年10月 | 澳洲墨爾本海岸100公里超級馬拉松 |
| 2014年11月 | 美國新墨西哥州85公里超級馬拉松 |
| 2015年1月 | 智利火山70公里超級馬拉松 |
| 2015年1月 | 南極100公里超級馬拉松 |
| 2016年9月 | 美國大峽谷273公里超級馬拉松 |
「選擇跑步、選擇去唔同地方體驗人生，用咗我好多時間、資源、金錢；亦都剝削咗好多搵錢機會，但，呢個係我嘅選擇。」
盧俊賢（Steve Lo），香港首位榮獲「馬拉松大滿貫」殊榮的跑手。他不是天生的運動員，只因前老闆一個「沙漠分享」，令他放棄在金融業賺錢的機會，寧願「攞苦嚟辛」，憑着「放棄不在選擇之列」的信念，三年間跑遍七大洲，透過極地體驗領悟人生。
赤腳童的「一啖水」
在一望無際的沙漠上，一個赤膊兼赤腳的男童向Steve索糧水，Steve送上「一啖水同幾粒糖」；沒料到個多小時後，他們在高山上重遇，「佢唔係再問我攞啲乜，純粹同我講多謝。我哋喺香港已經好幸福，一個5、6歲小朋友，喺咁惡劣嘅環境都可以好開心生活，攞咗你一啖水，感恩到爬上山只為同你講多謝」。同樣的沙漠，Steve遇上一班來自法國的消防員，他們推着輪椅載着一位殘障兒童參賽，讓他親身感受大自然，看得他煞是感動，「我上到一個好高嘅山，係啲好似人咁高嘅石頭組成，冇路㗎，你幻想吓推住輪椅上啲咁崎嶇嘅路係有幾難。我上到山頂，望番落山腳見到佢哋好努力咁推；嗰刻會覺得自己用雙腳跑上山係辛苦，其實人哋仲辛苦，呢個世界好多人辛苦過我哋好多百倍，但佢哋都堅持，畀到我好多正能量」。
期待下一個「我」
跑過沙漠、闖過南北極、上過高原雪山，三年間跑遍七大洲共八項馬拉松賽事，但Steve坦言每次參賽也沒甚期望，反而享受在毫無預測下感受環境帶給他的體驗，「唔止係挑戰自己，每次都會遇到啲好犀利、好多唔同見解嘅人，令你對人生有好大啟發，呢啲人畀到我嘅感受係深過完成七大洲嘅比賽，所以我不斷參賽，期望有下一班人impress（感動）我」。「我將呢啲難得嘅經驗，透過學校講座同社交媒體分享，經驗係要累積，儲多啲所見所聞，一個一個咁傳遞畀年輕人聽。」不過Steve明白到「聽人講不如親身體驗」，所以去年3月舉辦「五嶽山超級馬拉松世界賽」推廣跑步文化，更希望年輕人親身參與後，可以用自己的口去傳遞自己的故事，「透過辦比賽，令多啲人變成『我』，我未必可以帶佢哋去沙漠、去南北極，但起碼我可以製造環境畀佢哋，感受比賽背後嘅意義」。
冀帶病童感受世界
「我希望跑出更多幫人嘅路！」年底將出征安第斯山脈的Steve，盼以生命影響生命：「好想效法撒哈拉班消防員，希望籌組一班香港人，帶病童去感受世界，透過『跑』去籌款，幫佢哋喺復康路上平坦啲、順利啲。」
「我覺得身體嘅殘缺係人生入面一種挫折或者遺憾，但同時粉飾我哋嘅生命。如果冇咗呢啲難關，我哋未必會感受到生命真正嘅可貴。所以一齊去面對！放棄不在選擇之列，加油！」
過程緊要過結果
「每個人都應該放膽去做自己認為啱嘅事，唔應該驚失敗，因為人生唔會有永遠嘅成功，反之都冇永遠嘅失敗。冇既定嘅成功，就唔覺得有失敗；倒不如每樣嘢都放膽做、認真做，過程係緊要過結果！」撰文：李楚瑩
編審：梁劍紅
攝影(照片) ：tat
影片製作：Yapple Production & Lifewire
(部份照片、影片由受訪者提供)
