主持饮食节目、发展美容生意，还要带着两儿子经常母兼父职……艺人周家蔚（Janet）近期「百足咁多爪」。行程排得密密麻麻的她，从容面对，一句「我first priority(优先次序)系屋企先」，KO所有难题，完美演绎多栖妈咪角色。
要约这位大忙人妈妈做访问，难度真的达十分。「听日要飞」、「后日拍嘢」、「囝囝未放学」、「要接奶奶机」......好不容易约成了，「下昼要开会」、「夜晚老爷嚟食饭要准备」......访问最终只能「涉」于中段两个多小时在她的店舖进行。「等我化个快妆先！」不消15分钟，从饭局赶来的她，如摩打上身，极速「埋位」。
又幕前、又生意、又要照顾两儿子......究竟如何拿揑平衡？好奇的小编禁不住直进问题重心。笑着的Janet轻描淡写「就算你几忙，都系摆小朋友喺第一！」
「好落手落脚嘅先生」
「天明系一个好落手落脚凑嘅先生。」Janet坦言，维繫和谐一家，全赖与天明间的相互理解，协调分工。天明不时离港工作，家中的大小事务主要由Janet 处理，「佢唔喺度我就自己一个搏杀，佢一返嚟我就on relax mode...佢自己都好踊跃，我唔使讲佢已经抢着来做；我哋配合得好好。」
Janet还向他们灌输钱银概念，「要俾佢哋知钱个概念系点嚟。你着紧嘅衫、开水喉啲水系点样有、开灯点解会有电...我哋用完电要熄、水又唔好嘥。唔想佢哋乜都奉旨，摊开手就有。佢哋有时会话啲嘢系好贵，我哋唔好浪费钱啦！咁当然见到玩具佢哋唔会讲呢啲，但要从细灌输。」
「佢哋每日都有好多好窝心嘅嘢，细佬天真无邪嘅笑容，哥哥好细心好sweet：「妈咪I love you，我好锡你㗎...」摸下你个头、又锡下你个面，系暖男。」说毕笑至心心眼的Janet不讳言，两兄弟也有令人「呕血」之时。
「自己忍住吞血啦！」
Janet指每天教两兄弟做功课也很费神，更曾被老师投诉「慢吞吞」。「讲真系呕血，但我忍。捱到个关口就好开心！」她奉劝家长保持平和的心：「自己忍住吞血啦！」「唔好急、唔好迫佢，唔好等佢抗拒。耐性、EQ系好紧要。做功课啫！又唔系做啲乜嘢，唔好搞到好唔开心。其实最亲嘅人你就对佢最唔客气，讲句说话可以好难听；但佢系由一张白纸开始。由佢出世到而家都捱左咁多，日日换尿片餵奶都系咁，点解做功课又要咁忟？」
不少怪兽家长费尽心机，「塞爆」子女每天的行程，为子女铺自己心目中的理想「康庄大道」。Janet不敢苟同：「嗰个系你嘅目标，唔系佢嘅目标。你要活嘅，你活自己嘅人生，唔好要佢完成你自己嘅梦想。小朋友系一个个体，佢嘅人生要俾佢自己去行；唔好咩都安排晒。」
「唔好比较！」Janet认为人人皆有其独特之处，「或者佢有好多好叻嘅地方，你要观察，你要俾时间佢。」Janet拒做虎妈，对儿子们的兴趣和发展，採取「积极不干预政策」；她指快将生日的长子TJ尽得爷爷洪金宝的武术细胞真传，年纪轻轻已展示出耍兵器的天份，妈妈承诺送双节棍作为其生日礼物。
与其上心 不如放下
「乐观正面」Janet总爱挂在口边，但作为公众人物，尤其面对负面新闻，是否如此容易「 take it easy」？Janet坦言初入行时曾为此哭过；初与天明拍拖时，对方甚至着她别看娱乐杂志。日子久了，她渐渐领略到「It just a game！」作为娱乐圈中人，她明白到工作正是娱乐别人；只是讽刺的是，真相多不能成为娱乐他人的材料。庆幸，她参透出行内的游戏规则，更学懂放下。Janet耸耸肩：「没办法，做返好自己咪得啰，唔需要理人哋点讲。」就算儿子将来接触到这些负面新闻，她也不迴避，「 咪照事实同佢讲啰，又没乜唔俾得佢哋知。最紧要没嘢隐瞒，亦唔需要去猜猜度度，大家一家人。」
良心商人 先系成功
儿子的出现，让她学习更多、发现更多。最近创立的天然护肤品牌，跟「爱」都有所关连。当上妈妈后，对健康更为注意；尤其她本身患有湿疹，加上近年出现不少化学添加的负面报道，令她对天然用品更为坚持。
由最初学香薰精油作自用，至其后推出产品发售，她发现了最大的得着，「原来做落先知可以帮到人！」她坚持自行调配及亲身试用后才推出。「我送好多嘢俾朋友用， 我想大家用到我啲嘢系开心嘅，最多加天然精油，唔会加药性入去。好多化妆师都话我哋其实可以卖贵啲；但我系想多啲人用到、感受到，多于我哋想赚钱。」
「我哋真系落足真材实料，因为就算呃到人，都呃唔到自己，做一个有良心嘅商人，先至成功，个成功就系大家嘅口碑！」她曾经歷过半夜摸黑帮儿子「换唔到片」时的「忟憎」惨况，便设计了方便父母「换片」的魔术贴BB衫。Janet希望，做生意的同时，还能以方便及帮人的心态作出发点。
只要每日做好自己
事业、家庭，各取得平衡，她不讳言「系好幸福、系happy family」。但她仍自觉「成功」还有段距离，「 我唔敢讲成功住，每一日喺度学习紧。没话成唔成功嘅，只要每一日做好自己要做嘅嘢啰！」
美貌与智慧并重，也许不只是香港小姐的口号；还当是这位全能妈妈的写照。
