21 Dec 2016
极地人生 跑出助人之路
Steve's Profile （已婚，育有一女）
| 日期 | 完成赛事 |
|---|---|
| 2012年4月 | 撒哈拉沙漠250公里赛 |
| 2013年4月 | 北极42公里马拉松 |
| 2014年5月 | 台湾50公里超级马拉松 |
| 2014年6月 | 意大利高原雪山119公里超级马拉松 |
| 2014年10月 | 澳洲墨尔本海岸100公里超级马拉松 |
| 2014年11月 | 美国新墨西哥州85公里超级马拉松 |
| 2015年1月 | 智利火山70公里超级马拉松 |
| 2015年1月 | 南极100公里超级马拉松 |
| 2016年9月 | 美国大峡谷273公里超级马拉松 |
「选择跑步、选择去唔同地方体验人生，用咗我好多时间、资源、金钱；亦都剥削咗好多搵钱机会，但，呢个系我嘅选择。」
卢俊贤（Steve Lo），香港首位荣获「马拉松大满贯」殊荣的跑手。他不是天生的运动员，只因前老闆一个「沙漠分享」，令他放弃在金融业赚钱的机会，宁愿「攞苦嚟辛」，凭着「放弃不在选择之列」的信念，三年间跑遍七大洲，透过极地体验领悟人生。
赤脚童的「一啖水」
在一望无际的沙漠上，一个赤膊兼赤脚的男童向Steve索粮水，Steve送上「一啖水同几粒糖」；没料到个多小时后，他们在高山上重遇，「佢唔系再问我攞啲乜，纯粹同我讲多谢。我哋喺香港已经好幸福，一个5、6岁小朋友，喺咁恶劣嘅环境都可以好开心生活，攞咗你一啖水，感恩到爬上山只为同你讲多谢」。同样的沙漠，Steve遇上一班来自法国的消防员，他们推着轮椅载着一位残障儿童参赛，让他亲身感受大自然，看得他煞是感动，「我上到一个好高嘅山，系啲好似人咁高嘅石头组成，没路㗎，你幻想吓推住轮椅上啲咁崎岖嘅路系有几难。我上到山顶，望番落山脚见到佢哋好努力咁推；嗰刻会觉得自己用双脚跑上山系辛苦，其实人哋仲辛苦，呢个世界好多人辛苦过我哋好多百倍，但佢哋都坚持，畀到我好多正能量」。
期待下一个「我」
跑过沙漠、闯过南北极、上过高原雪山，三年间跑遍七大洲共八项马拉松赛事，但Steve坦言每次参赛也没甚期望，反而享受在毫无预测下感受环境带给他的体验，「唔止系挑战自己，每次都会遇到啲好犀利、好多唔同见解嘅人，令你对人生有好大启发，呢啲人畀到我嘅感受系深过完成七大洲嘅比赛，所以我不断参赛，期望有下一班人impress（感动）我」。「我将呢啲难得嘅经验，透过学校讲座同社交媒体分享，经验系要累积，储多啲所见所闻，一个一个咁传递畀年轻人听。」不过Steve明白到「听人讲不如亲身体验」，所以去年3月举办「五岳山超级马拉松世界赛」推广跑步文化，更希望年轻人亲身参与后，可以用自己的口去传递自己的故事，「透过办比赛，令多啲人变成『我』，我未必可以带佢哋去沙漠、去南北极，但起码我可以制造环境畀佢哋，感受比赛背后嘅意义」。
冀带病童感受世界
「我希望跑出更多帮人嘅路！」年底将出征安第斯山脉的Steve，盼以生命影响生命：「好想效法撒哈拉班消防员，希望筹组一班香港人，带病童去感受世界，透过『跑』去筹款，帮佢哋喺復康路上平坦啲、顺利啲。」
「我觉得身体嘅残缺系人生入面一种挫折或者遗憾，但同时粉饰我哋嘅生命。如果没咗呢啲难关，我哋未必会感受到生命真正嘅可贵。所以一齐去面对！放弃不在选择之列，加油！」
过程紧要过结果
「每个人都应该放胆去做自己认为啱嘅事，唔应该惊失败，因为人生唔会有永远嘅成功，反之都没永远嘅失败。没既定嘅成功，就唔觉得有失败；倒不如每样嘢都放胆做、认真做，过程系紧要过结果！」撰文：李楚莹
编审：梁剑红
摄影(照片) ：tat
影片制作：Yapple Production & Lifewire
(部份照片、影片由受访者提供)
